5 oktyabr Beynəlxalq Müəllimlər Günüdür

 5 Oktyabr – Beynəlxalq Müəllimlər Günü münasibətilə Gəncə Dövlət Universitetinin Filologiya və xarici dillər fakültəsində Azad Həmkarlar İttifaqının dəstəyi ilə müəllim əməyinə həsr olunmuş tədbir keçirilib.
Tədbirdə fakültənin professor-müəllim heyəti, tələbələr, fakültədə uzun illər fəaliyyət göstərmiş və hazırda təqaüddə olan müəllimlər, eləcə də universitetin ictimai həyatında fəal iştirak edən əməkdaşlar iştirak ediblər.
       Tədbirdə çıxış edən Gəncə Dövlət Universiteti Azad Həmkarlar İttifaqı Komitəsinin sədri dosent Afaq Qasımova fakültədə uzun illər fəaliyyət göstərən professor-müəllim heyətinə (N.Axundova, S.Cəfərova, A.Həmidov, G.Mehrəliye va, R.Adilov, G.Hüseynova, S.Əliyeva, M.Yusifov,H.Abbasov, B.Qədirov)təhsil və pedaqoji fəaliyyətlərində göstərdikləri xidmətlərə görə fəxri fərmanlar təqdim etdi. Daha sonra fakültənin bir qrup müəllim heyətinə Komitə tərəfindən pul mükafatının təyin edilməsi elan olundu. Təltif olunan müəllimlərə göstərilən diqqət onların əməyinə verilən yüksək qiymətin ifadəsi kimi dəyərləndirilib.

        Filologiya və xarici dillər fakültəsinin dekanı professor Yadigar Əliyev çıxış edərək fakültədə uzun illər fəaliyyət göstərmiş, hazırda isə təqaüddə olan müəllimlərə (Ə.Əsgərov, M.Veysəlova, S.Zülqədərova, E.Mustafayeva, R.Orucova) Universitetin çoxillik fəaliyyətinə verdikləri töhfələrə görə təşəkkürnamələr təqdim etdi. Fakültənin inkişafında mühüm xidmətləri olmuş keçmiş əməkdaşlarla görüş iştirakçılar üçün həm qürurverici, həm də duyğulu anlarla yadda qaldı.

        Filologiya və xarici dillər fakültəsi Azad Həmkarlar Təşkilatının sədri filologiya üzrə fəlsəfə doktoru Aynur Novruzova çıxış edərək bu əlamətdar gündə universitetin inkişafında böyük xidmətləri olmuş və artıq dünyasını dəyişmiş müəllimlərin də xatirəsini yad etməyin vacib olduğunu vurğuladı. A.Novruzova  qeyd etdi ki, belə tədbirlər bir tərəfdən müəllimlərin əməyinə verilən dəyəri nümayiş etdirir, digər tərəfdən isə fakültənin müxtəlif nəsillərini bir araya gətirərək ənənə ilə müasirliyi, keçmişlə gələcəyi birləşdirən mənəvi bağların qorunmasına xidmət edir.

       Tədbirin ən yaddaqalan məqamları əbədiyyətə qovuşmuş müəllimlərlə bağlı videoçarxın,eyni zamanda  tələbələrin müəllimlər üçün hazırladıqları video təbriklər oldu. Tələbələrin müəllimləri haqqında söylədikləri səmimi fikirlər, təşəkkür və xoş arzular tədbirə xüsusi ab-hava qatdı.

       Sonda bütün müəllimlər 5 Oktyabr – Beynəlxalq Müəllimlər Günü münasibətilə təbrik edildi, onlara möhkəm cansağlığı, pedaqoji fəaliyyətlərində uğurlar və yeni nailiyyətlər arzulandı.